الجمهور المغربي كيعاني بسبب البلاصة اللي عطاوه فالتيران: فيها الشمس قاصحة وتقدر تسبب إغماءات ومؤثرة على تشجيعهم للأسود

كيعاني الجمهور المغربي اللي كيدخل لتيران لورون باكو، بسبب البلاصة اللي كيعطيوها منظمين ماتشات كوب دافريك للمشجعين المغاربة فتيران لورون باكو فسان بيدرو.
والبلاصة المخصصة للجماهير المغربية كتكون ضاربة فيها الشمس بشكل كبير وقوي، وهذا الشي كيأثر على المشجعين المغاربة صحيا حيث كاين اللي جاتو الشقيقة واللي ضرو راسو بالشمس، وهذا الشي من غير تأثيرها على المجهود ديالهم فتشجيع المنتخب المغربي.
الجماهير المغربية 2 ماتشات وهي كنعاني بسبب البلاصة اللي تعطاتها فالتيران، المرة الاولى ضد تنزانيا والثانية كانت البارح ضد الكونگو الديمقراطية، والغريب ان بلاصة المغاربة ضاربة فيها الشمس، والمشجعين ديال المنتخبات الاخرى بلايصهم مغطية ومرتاحين فيها.
وكيطالب الجمهور المغربي المنظمين ديال ماتشات كوب دافريك التدخل لحل المشكل، ويبدلو لهم البلاصة، خوفا من شي إغماءات ولا شي حاجة تقدر تصيب المشجعين المغاربة فالتيران، ويعطيوهم شي بلاصة مغطية باش يحافظو على صحتهم وايضاً يشجعو المنتخب المغربي براحة، وهكذا تكون المساوات مع باقي الجماهير اللي منتخباتها كتلعب فنفس المجموعة السادسة.