الوينرز مشاو لتيران بنجلون موتيفاو لاعبين الوداد قبل الديربي

كيواصل جمهور الوداد الرياضي دعم الفريق الأحمر رغم الظروف الصعبة اللي كيدوز منها، ومن بينها الاعتقال الاحتياطي لرئيس النادي سعيد الناصيري على خلفية قضية "إسكوبار الصحرا"، والنتائج السلبية مؤخرا للفريق، وتلقاو اليوم اللاعبين وحفزوهم قبل ماتش الديربي.
وحضرو كروب "الوينرز" هاد العشية لتيران بنجلون مقر الوداد الرياضي فكازا، وشجعو اللاعبين والطاقم التقني للفريق بقيادة التونسي فوزي البنزرتي، وهزو لهم المورال قبل ماتش الديربي ضد الرجاء الرياضي اللي غيتلعب الاربعاء الجاي ويكلو فتيران البشير بالمحمدية ضمن الدورة 14 من البطولة. وموتيفاوهم باش يربحو المباراة المهمة وسط أجواء حماسية وزوينة.
ودارو الوداد الرياضي مساء اليوم الاثنين حصة تدريبية هي قبل من الأخيرة استعدادا لماتش الديربي، وكتحاول الجماهير الودادية ترفع المورال للاعبين وتخرجهم من الضغط، خصوصا بعد النتائج السلبية مؤخرا، وكان آخرها الخسارة مع آسفي فالبطولة، والوداديين عارفين أن الرباح فالديربي يقدر يخرج الفريق من الأزمة اللي طايح فيها د النتائج وأن الخسارة غتزيد تغرقو وتبعدو على لقب البطولة فهاد الموسم.