مسؤول فالأغلبية ل"كود": مكايناش زيادة فصالير الأساتذة ف2024..ولكن ف2025 غاتزاد ليهم شي بركة

تفاعلا مع مقال "كود" اللي نشرناه البارح بعنوان ""وهم" تجميد النظام الأساسي والزيادة فصالير الأساتذة..كيفاش الحكومة مقدراتش تواجه أزمة كبيرة فالتعليم .."، أكد مسؤول في الأغلبية الحكومية ل"كود" أنه فعلا مكاينش زيادة فصالير الأساتذة سنة 2024′′.
وأوضح المسؤول في الأغلبية في اتصال مع "كود" أن البرلمان صادق يوم أمس على مشروع قانون مالية 2024، واللي غادي يخرج فالجريدة الرسمية قريبا، ومقتضيات هاد القانون مافيهش زيادة فأجور الأساتذة نهائيا، وكل ما يراج عن الزيادة هو كذب.
واستدرك المسؤول في الأغلبية ل"كود" بالقول :"ولكن هذا لا يعني أن ملف تحسين أجور الاساتذة مكاينش فأجندة الحكومة، بالعكس كاين توجه باش يتفتح نقاش مسؤول غايبدا السنة المقبلة حول تخفيض مهم للضريبة على الدخل بالنسبة للطبقة المتوسطة واللي غادي يكون عندها انعكاس ايجابي على أجور موظفي التعليم".
وأكد المصدر نفسه الذي فضل عدم ذكر اسمه، بأن النقاش حول تحسين أجور الطبقة المتوسطة غايكون طبعا في إطار مشروع قانون مالية سنة 2025، أو قانون مالية تعديلي اذا استدعت الضرورة لذلك.