الحاجة اللي متشبه لمولاها حرام: محرز عداوه الكبرانات وبدا داوي خاوي على بونو صانع التاريخ الإفريقي فالمونديال.. الجزائري باغي الكورة الذهبية صحة

خرج الجزائري رياض محرز لاعب أهلي جدة السعودي باغي يضغط قبل أسابيع على موعد منح الكورة الذهبية الإفريقية اللي كيعطيها الكاف لأحسن لاعب إفريقي، فحفل غيتقام هاد العام فمراكش فدجنبر المقبل، وهاجم الجزائري النجم المغربي ياسين بونو بلا حتى شي مبرر.
رياض محرز، وخلال حوار تناقلاتو مواقع جزائرية عن جريدة "ليكيب" الفرنسية، خرج كيشكر فراسو بشكل مغرور وباسل بزاف ومادرها لا ميسي ولا رونالدو اللي شابعين جوائز عالمية وكورة ذهبية، وقال الجزائري: "بالنسبة للمنافسة على الكورة الذهبية راه ديما كاين المصري محمد صلاح، والسنغالي ساديو ماني، مرشحين باش يربحوها، ولكن الموسم الماضي كان صعيب عليهم وأنا كنت مزيان على المستوى الجماعي وربحت 3 ألقاب الموسم الماضي".
وغير بوحدو رياض محرز بدا كيدخل وكيخرج فالهضرة وكيبرر وقال: "كنت الموسم الماضي أنجح اللاعبين فبطولة النكليز، وكأس الاتحاد النكليزي، فدوري أبطال أوروبا كنت أقل تأثيرا، ولكن فالمواسم الأخيرة كنت ديما مؤثر فالشومبونزليك ومتميز".
الجزائري ما قدوش هذا الشي وداز لياسين بونو اللي محقق إنجاز تاريخي الأفضل والأهم فتاريخ الكورة الإفريقية بالوصول إلى دومي فينال كأس العالم 2022 فقط، وقال: "سمعت بلي كاين اللي كيضغط باش ياسين بونو ياخد الكورة الذهبية، بعدما ربح اليوروبا ليك، وتألق فكاس العالم مع المغرب، ولكن راه حتى حاجة ما يمكن تقارن مع الثلاثية التاريخية (الألقاب اللي محرز ربح مع مان سيتي)".