كيف ما من حق أي مغربي يتضامن مع غزة من حقو يتضامن مع إسرائيل ويمشي گاع يتطوع في الجيش الإسرائيلي راه ماشي مسألة شكون على حق بل غير مسألة إينا فرقة كتشجع وصافي والرمضاني موشكلتو انه قصة نجاح ولد الشعب لذا گاع ولاد الشعب بحالو ديما ضدو

كيف ما من حق أي مغربي يتضامن مع غزة ويطالب بفتح الحدود گاع راه من حق أي مغربي يتضامن مع إسرائيل ويحزن لما أصابهم ويمشي گاع يتطوع في الجيش الإسرائيلي باش يحافظ على أمن الإسرائليين من عصابات حماس، كما كون كان كيفاش راه حتى المغاربة وباقي العالم من حقهم يحاربوا جنب الفلسطنيين وراه كانوا كيحاربوا جنبهم الناس من العالم كامل من اليابان وألمانيا وميريكان والبرتغال وفرنسا والعديد من الدول، حيت القضايا السياسية المزعلكة لي كتطول بزاف مميبقاش فيها شكون لي معاه الحق غادي نوقف جنبو بل فقط ميل عاطفي بحال الى غادي تشجع الريال او البارصا تاواحد معندو شي سبب مقنع من غير واش ورث هاد التشجيع من واليديه او غير لقى راسو كيبغي هاد الفرقة على خرى وصافي.
واش إسرائيل خدات ارض الفلسطنيين وجرات عليهم اييه، ولكن راه هاكا كيتأسسوا الدول الجديدة، هاهي الجزائر لاصقة فينا خدات ليها فرنسا شوية من أي دولة حداها، دابا نيت راه كاين مواطنين في بشار رغرب الجزائر جدودهم كانوا مغاربة وهوما جزائريين دابا، داو الأرض بمواطنيها وخيراتها وكون غير يقنعوا ويهنيونا باقين طامعين يقسمو المغرب على جوج، ومع ذلك ماغادي تلقى تاخد داير استرجاع الأراضي المغربية التابعة للجزائر كهدف نضالي، كاين فقط القضايا الجايا من الشرق، والموشكيل هي في فرض الرأي الواحد تضامن معانا مع فلسطين او راك صهيوني راه من هادي للتكفير.
وهادشي لي واقع للرمضاني حتى ولاو كيحرضو ضدو بشكل شخصي في المظاهرات بحال الى هو بنغريون شخصيا، بالنسبة ليه ماشي هادي اول مرة ديما هاجمين عليه ومن كل الاطياف مسلمين ..ملحدين ..رجعيين.. حداثيين.. يساريين.. يمنيين.. خوانجية.. سكايرية.. قليل فين تسمعها فيه زينة، وطبعا هادشي ميعني النجاح والموشكيل ديال الرمضاني ماشي شنو قال او دار والمواقف ديالو، بل فقط أنه قصة نجاح ولد الشعب من منطقة منسية ولد مخازني قدر يقرى ويوصل ويولي معروف وعندو مسار مهني وكيتخلص مزيان وعندو وزن وكلمة، الهجوم عليه ديما مبني على الحسد والغيرة من النجاح ديالو، كون كان شي بناني سميرس بلق وزين وكابر في الميسيون وقاري برى واخا ودار مسار صحفي فرانكوفوني واخا ينضم لحزب ليكود مايهدر معاه حد واخا يتناسب مع شارون حيت منتظرة منه، اما فاش كيشوفو المواطن الأسمر لي وجهو موجود في السويقات ومن ورا الكرارس دالخضرة وقبالة الجوامع وفي لوائح هادوك لي مشاو لسوريا راه كيستكثرو عليه النجاح وانه يولي من علية القوم وكيبقاو يستسغرو منو ومن مساره المهني، باع الماتش كيلحس الكاپة وهوما نيت كيقلبوا بالريق الناشف على الكاپة لي يمسحوها والماتش لي يبيعوه وملقاوش، وتحية للرمضاني مسار مهني كلو نجاح وملو هجوم وباقي مواصل مع مهم.