الترجي تدربو مع حكام الماتش ضد الوداد فدونوز.. واش هادشي معقول ؟

سالاو الترجي التونسي التحضيرات ديالهم لمواجهة الوداد الرياضي اليوم الاحد فماتش دومي فينال السوبر ليك الافريقي فستاد دونور فكازا.
الترجي التونسي دارو الحصة التدريبية الاخيرة قبل ماتش الوداد الرياضي، وكانت البارح السبت مع 7 العشية فتيران مركب محمد الخامس، نفس التوقيت و الملعب اللي غيكون فيه الماتش غدا ضد الواك.
الفريق التونسي دخل على راحتو لستاد دونور والطاقم التقني واللاعبين ديالو تدربو بحال إلى راهم كيتدربو فتيرانهم، وكانوا ناشطين وفرحانين بالاستقبال اللي دايرينو لهم المغاربة، وتداريبهم دازت مزيان.
الحاجة الغريبة اللي عاين "كود" خلال الحصة التدريبية ديال الترجي، هي أن اللجنة المنظمة للسوبر ليك الافريقي، برمجت تداريب الطاقم التحكيمي المصري ديال ماتش الوداد الرياضي والترجي التونسي فنفس التوقيت اللي فيه تداريب الفريق التونسي، وهذا الشي كيطرح مجموعة من علامات الاستفهام على هذا القرار وكيخلي الشكوك والقيل والقال، خصوصا وان الترجي معروف بالكواليس وحرب الأعصاب قبل الماتشات ديالو.