لعابة فرانسا سارة قرشاوي: انا فرنساوية من اصل مغربي وفرحة كبيرة نلعب ضد المغرب وضد صاحبتي انيسة

فماتش المغرب ضد فرانسا فمونديال السيدات فاستراليا نيوزلندا غدا الثلاث 8 غشت 2023 غادية تلعب لعابات بالتوني الفرنسي ضد المغرب اللي منها جات عائلتهم. غادية تلعب لعابات من المغرب ضد فرانسا اللي تزادو فيها ولعبو مع منتخباتها قبل وتعلمو فانديتها واحتارفو فيها.
سارة قرشاوي لاعبة مع المنتخب الفرنسي لكرة القدم من اصل مغربي كتقول "كنا عارفين قبل ما نبداو المونديال باللي ممكن نتلاقاو مع المغرب. اليوم هادي حقيقة"
اللعابة قالت "انا فرنسية من اصل مغربي. فرحة كبيرة نواجه المغرب فثمن النهاية٬ هادا غادي يكون اول ماتش لي ضد المغرب. غادية تكون المشاعر ولكن المهم فهاد الشي هو نربحو".
اللعابة قالت باللي غدا لثلاث ما يمكنش ليها تتمنى للمغرب الرباح كيف قبل. وهدرات علي علاقتها بصديقتها انيسة الحماري "لعبت مع انيسة الفئات الصغرى مع المنتخب. هي صديقتي ولعابة مزيانة تقنيا. عارف هاد الشي فشي شكل" واكدات باللي غادية تنسى كلشي "باش نبداو الماتش" وذكرات حتى الادارة التقنية كاين "دافيد دوتشي وطوماس باڤيون دوزو مرحلة فالمغرب. بقى فقلبهم".
سارة قالت باللي "غدا لثلاث غادي يكون نهار خاص عند بزاف" ولكن اكدات باللي عازمات "نحققو الاهم ونتاهلو"