علاش "كنهدي التأهل لسيدنا" اللي قالتها لحماري غادية تصطي جينرالات الجزائر. اللعابة من ام مغربية واب جزائري اختارت المغرب على فرانسا والجزائر وها الثمن اللي خلصاتو

علاش عبارة "كنهدي هاد التأهل لسيدنا" اللي قالتها اللعابة انيسة لحماري اللي تختارت احسن لعابة فماتش المغرب ضد كولومبيا فمونديال استراليا واللي بيها تأهلو اللبؤات لدور الثمن ماشي عبارة عادية.
اللعابة عندها قصة مثيرة مع اللبؤات تعاودها ليكم "كود". هي فرنسية جزائرية مغربية. فرنسية حيث تزادت وجزائرية من الاب ومغربية من الام.
اختارت هاد الموهبة القميص المغربي. ولكن راها لعبات مع فرانسا وجربات مع الجزائر. اختيار القلب كان المغرب. حتى باش سولاتها "كود" بعد الماتش كانت كتكلم بفخر على هاد الاختيار وهدرات علي مواجهة مع فرانسا وقالت باللي غادية تلعب باش دافع علي التوني.
لكن اختيارها ما فرحش كلشي. ماماها المغربية لعبات دور فاقناعها وفق مصادر "كود". كانت السبب باش تلبس التوني ديال اللبؤات. هاد الاختيار قلق والدها٬ تشرح مصادر "كود"٬ هاد التقليقة خلاتو يقطع الهدرة معاها گاع تضيف مصادر "كود".
طبعا الجزائر وجينرالاتها كانو تحركو باش تلعب معاهم. هي ختارت المغرب واليوم فرحانة بفوزها واكيد والدها مفتاخر بيها وبزاف.
هاديك اهداء لسيدنا غادية ضر اكثر جينرالات الجزائر اللي دارو كلشي اللي فيديهم باش تلعب مع منتخبهم او غير باش ما تلبش توني المغرب. ودابا غادي يمرضو كثر