وسط معنويات مرتفعة وأجواء زوينة.. اللبؤات دخلو فالتركيز على ثمن نهائي المونديال وبداو كيوجدو لفرنسا

دخل المنتخب الوطني المغربي للسيدات، فالكونسونطراسيون على ماتش ثمن نهائي كأس العالم للعيالات 2023، بأستراليا ونيوزيلاندا، اللي غيلعبو أمام منتخب فرنسا الثلاثاء الجاي بمدينة أديلايد الأسترالية.
ودار المنتخب الوطني المغربي حصة تدريبية صباح اليوم السبت، تحت إشراف الناخب الوطني رينالد بيدروس، وعرفت عودة اللاعبات الأساسيات للمشاركة فالتداريب، بعدما عطاهم المدرب عطلة يوم واحد البارح الجمعة، باش يرتاحو فيها من ماتش كولومبيا اللي لعبوه الخميس الماضي، برسم الجولة الأخيرة من دور المجموعات.
تداريب المنتخب المغربي كانوا فيها جميع اللاعبات اللي تدربو وسط أجواء زوينة ومعنويات مرتفعة، وركز فيها الناخب الوطني رينالد بيدروس والطاقم التقني ديالو على الجانب البدني د البنات، باش يحيدو منهم عيا ماتش كولومبيا ويرجعو لهم لافريشور فيزك، وكذلك بدا التركيز على النهج التكتيكي والأسلوب اللي غتلعب به ليكيب ناسيونال أمام الفرنسيات.
ومازال عند المنتخب المغربي النسوي جوج حصات تدريبية، يوم غدا الأحد وأخيرة قبل الماتش غتكون يوم الاثنين، باش يوجد لمواجهة فرنسا المصيرية برسم ثمن نهائي مونديال العيالات، وهي البطولة اللي كيتعتبر فيها المنتخب المغربي من أكبر المفاجأت إلى حدود الآن، بعدما تأهل عن المجموعةH، وتسبب فإقصاء ألمانيا بطلة العالم 2003 و2007، وبطلة أوروبا، واخا ربحاتو بنتجية 6 لزيرو فأول جولة، ولكن المغربيات دارو ريمونتادا وربحو كوريا الجنوبية وكولومبيا فالجولة الثانية والثالثة، ودازو يلعبو مع فرنسا فثمن النهائي.