المنتخب المغربي سالا التحضيرات لكوريا وسط أجواء مزيانة وتركيز كبير من اللاعبات على الرباح

سالا المنتخب الوطني المغربي النسوي اليوم السبت، الاستعدادات ديالو لمواجهة منتخب كوريا الجنوبية فالماتش اللي غيتلعب غدا الأحد، برسم الجولة الثانية من كأس العالم للسيدات 2023، بأستراليا ونيوزيلندا.
دار المنتخب المغربي قبل لحظات من صباح اليوم السبت، اللي هو المساء بأستراليا، آخر حصة تدريبية قبل مواجهة كوريا الجنوبية، وعرفت مشاركة جميع اللاعبات، اللي خدم معهم الناخب الوطني رينالد بيدروس والطاقم التقني ديالو على آخر الروتوش والنهج التكتيكي اللي غيلعبو به ضد الكوريات، بالإضافة إلى الرفع من لافريشور فيزيك، وكانت المعنويات د اللاعبات مزيانة ورجعو المورال.
وكيطمح المنتخب المغربي النسوية لتجاوز الخسارة الثقيلة فالجولة الأولى لكاس العالم أمام ألمانيا بسداسية، بتحقيق أول رباح للكرة المغربية فكأس العالم، من خلال مواجهة كوريا الجنوبية غدا الأحد، فالماتش اللي غيبدا مع 2 ونصف د النهار بتوقيت أستراليا وهي 5 ونصف د الصباح بتوقيت المغرب، وراه لا خيار للاعبات المغربيات من غير الرباح فهذا اللقاء باش يحافظو على الحظوظ للتأهل إلى الدور الثاني.