الناصيري موتيفا لاعبين الحمرا على الرباح ضد الخضرا

تدخل سعيد الناصيري رئيس الوداد الرياضي باش يرفع من معنويات اللاعبين، قبل ماتش ديربي دومي فينال كاس العرش، ضد الرجاء الرياضي الأحد الجاي فستاد دونور بكازا.
وحسب مصدر مطلع، فرئيس الوداد الرياضي دار اجتماع مع لاعبين الفريق وحفزهم باش يربحو الديربي ضد الرجاء الرياضي، ويتأهلوا للفينال ديال كاس العرش، وخصص لهم بريم مهم كيوصل لمبلغ 2 مليون سنتيم مقابل الرباح وتحقيق التأهل إلى النهائي.
وأكد نفس المصدر، بلي الأجواء داخل الوداد الرياضي زوينة وأن المرال ديال عناصر الفريق مزيان، خصوصا بعد اللقاء مع البريزيدون د النادي، واللاعبين كاملين مركزين على تحقيق الرباح.
وغيواجه الوداد الرياضي الغريم ديالو الرجاء الرياضي الأحد الجاي بملعب مركب محمد الخامس بالدار البيضاء ابتداء من 5 لعشية، برسم دومي فينال كاس العرش والهدف ديالو يربح ويتأهل لفينال كاس العرش اللي عازم الفريق يخرج متوج بها هذا الموسم.