وزيرة المالية كلاشات البي جي دي: متغلطوش المغاربة الغازوال داير 12 درهم ماشي 14 ونتوما لي عطلتو مشاريع تحلية الماء ف10 سنين

وزيرة المالية نادية فتاح علوي، كلاشات برلماني البي جي دي مصطفى الإبراهيمي بسبب أسعار الغازوال والمزايدات بموضوع التضخم.
البرلماني الأبراهمي هضر اليوم بمجلس النواب على أن الحكومة السابقة عطات وضعية مزيان للحكومة الحالية ديال التضخم وانتقد استمرار ارتفاع أسعار الغازوال.
فتاح العلوي ردات عليه بالقول: "صحيح بأن الحكومة السابقة سلمتنا تضخم بنسبة 2 في المائة ولكن جات الحرب الروسية والأوكرانية وارتفاع الأسعار، وفي نفس الوقت الحكومة السابقة عطاتنا واحد تأخر 10 سنين في مجموعة مشاريع كتهم بنيات تحتية، خصوصا ديال الماء لي عندو تأثير على الفلاحة".
وتابعت بأن "أسعار النقل لم ترتفع لأن الحكومة دعماتها ويمكن نتوما مستفدتوش منها حيث مكستعملوش الطاكسي والطوبيس".
وأضافت الوزيرة: "أسعار الغازوال يمكن نشير بلي مبقاتش 14 درهم فالمحطات وبالتالي نعطيوكم بعض المعلومات باش ما تاخدوش بهاد الأرقام".
رئيس فريق الأحرار محمد غياث انتفض ضد البي جي دي، وقال بلي من حق الوزيرة تجاوب وتصحح المغالطات ديال بعض البرلمانيين.