بعد كاريدو.. صابر نوضها مع زفين فاندنبروك وزاد قبل دومي فينال العصبة ضد صن داونز

قرر المدرب المساعد بالوداد الرياضي عبد الإله صابر يمشي من الفريق بسبب نقاش مع المدرب الجديد البلجيكي زفين فاندنبروك، وهاد الشي قبل ماتش الحمرا مع ماميلودي صن داونز الجنوب إفريقي بعصبة أبطال إفريقيا.
وحسب مصادر جيدة الاطلاع، فعبد الإله صابر نوضها مع المدرب زفين فاندنبروك مع بداية الفريق فالاستعداد لمواجهة صن داونز الجنوب إفريقي، وقرر يمشي من الحمرا وهذه المرة الثانية اللي كيوقع مشكل ما بين صابر ومدرب فالوداد، حيث سبق له نوضها مع الإسباني كارلوس كاريدو اللي مشى بحالو الأسبوع الماضي.
ومن جهتو مدرب الوداد الرياضي زفين فاندنبروك مشى تشكى لرئيس النادي سعيد الناصيري من تصرفات عبد الإله صابر، وصعيب يرجع يخدم بالواك، خصوصا وأن هذا الشي وقع خلال هذا الوقت الحساس اللي فيه الفريق مقبل على مواجهة مصيرية في دومي فينال عصبة أبطال إفريقيا.