مع اقتراب جمع عام الرجاء الرياضي المقرر أن ينعقد يوم 26 ماي الحالي، فيوم بعد آخر كيبان أن الرئيس الأسبق محمد بودريقة هو الأقرب والأكثر حظوظا للصعود إلى رئاسة النادي من جديد خلفا لعزيز "الهضراوي". وكشفت مصادر مطلعة لموقع "كود" أن جميع المؤشرات داخل الرجاء الرياضي كتقول بلي محمد بودريقة هو المرشح اللي كيتسناوه الرجاويين لإنقاذ الفريق من الأزمة اللي حطو فيها عزيز البدراوي، ومن بين الرجاويين اللي داعمين بودريقة كاينين منخرطين وجماهير مازال مقلقين منو بسبب المرحلة السابقة اللي ترأس فيها النادي بسبب شي أخطاء وقعات في تلك الفترة، ولكن وفنفس الوقت عندهم قناعة أن ولد حي الادريسية بدرب السلطان فكازا، بوحدو اللي قادر يهز الفريق على كتافو دابا، سوا ماديا بحل الأزمة والتعاقد مع لاعبين بقيمة الخضرا يجيبو ألقاب على المدى القريب والمتوسط ثم البعيد، أو من ناحية العلاقات مع المؤسسات حيث الرجاء محتاجة للمصالحة مع ذاتها ومع الجميع بعدما خاصمها "الهضراوي" مع مكوناتها ومع باقي المؤسسات بسبب الترويج ديالو للمغلاطات والحملات. من جهة أخرى، وبخصوص محمد حوراني المرشح الآخر لرئاسة الرجاء الرياضي خلفا لعزيز البدراوي، فوضحت نفس المصادر أن الحظوظ ديالو قليلة للفوز برئاسة النادي، وهذا الشي إذا ترشح بالفعل، والأكثر من هذا فهو وشي وحدين معه من المنخرطين ولو أنهم قلال بزاف كانوا باغيين يتقدموا بطلب إلى المكتب المديري الحالي من أجل تأجيل الجمع العام من 26 ماي إلى شهر يوليوز المقبل، باش الحوراني يوجد المشروع ديالو الانتخابي وغير هذا الطلب اللي بداو كيرجوا له ضعفهم بزاف حسب نفس المصادر حيث أغلبية المنخرطين رفضوه رفضا تاما وكيطالبو بأن الجمع العام يتقام يوم 26 ماي، وكيشوفو أنه لا يمكن يبقى منصب الرئيس خاوي والأكثر من هذا فكيشوفو أن أي منخرط باغي يترشح للرئاسة مفروض عليه يكون واجد ماشي يبدا يطلب من دابا بتأجيل الجمع العام باش يوجد الترشيح ديالو. Morocco Soccer Club World Cup أما باقي الأسماء اللي كتروج، فحسب ذات المصادر هي غير أرانب سباق، وكاين فيها اللي باغي يروج الاسم ديالو خلال هذه الحملة الانتخابية وصافي بحال كل مرة كيتعلن على جمع عام لانتخاب رئيس جديد بالرجاء، ومن بينها عادل هالا اللي جاي من ميريكان، وحسب اللي كيعرفوه فراه باغي غير يدخل لشي مكتب مديري في إطار شي توافقات إذا كانت، أما رئاسة النادي خاصها الإمكانيات والنفس الطويل والعلاقات القوية داخل برلمان الرجاء، حيث الكولسة صعيبة والمنخرطين يغطيوك "رئيس" ويعريوك "مرشح سابق للرئاسة"، ونفس الأمر بالنسبة لكمال المكسي أو الحاج الكمال كيفما كيلقبوه الرجاويين، فهو ولو أنه كانت عندو الجرأة أنه يخرج يعلن الترشح ديالو للرئاسة، فكيبقى خيار مستبعد بزاف، أولا بسبب الشعبوية د الخطابات ديالو والرجاويين من بعد عزيز "الهضراوي" رافضين شي واحد بنفس المواصفات، وثانيا راه المنخرطين كيطالبو أن القانون الداخلي يتطبق معه بعدما وقفو البدراوي الرئيس المستقيل هو والمنخرط حسن الرزاغي عام 2022، ودابا خاص الاثنين يمشيو حتى الجمع العام يتسناو مصيرهما واش غيتم التشطيب عليهم من طرف المنخرطين أو يرفضوا ذلك ولو أن البدراوي حيد لهم التوقيف وهذا الإجراء اللي قام به في خرق القانون الداخلي، وإضافة إلى كل هذا فالحاج كمال تحسب عليه ملف "كوياطي"، وهذا واحد اللاعب كان جابو للرجاء صيف 2021 في عهد الرئيس رشيد الأندلسي، وهو مهاجم ما كانش بالمستوى ديال الفريق وغضبو عليه الرجاويين منخرطين وجماهير وكاين فيهم اللي اتهمه بالسمسرة فاللاعبين على حساب الفريق وناض فيها الصداع لدرجة أنهم اصبحو كيلقبوه بالحاج كوياطي. وبخصوص الإسمين الأخرين المتداولين سوا عبد الرزاق المنفلوطي الرئيس السابق للاتحاد البيضاوي أو سعيد حسبان الرئيس الأسبق للرجاء، أكدت المصادر أنه بعدما راجت الهضرة حول رغبة تشرح المنفلوطي وهو براني على النادي وعمرو كان منخرط فيه، فالمنخرطين بالرجاء الرياضي ومن بينهم منخرطين وازنين وعندهم كلمتهم، قرروا بأن سيناريو البدراوي ما غاديش يتعاود واكدوا على ضرورة الالتزام بتطبيق القانون في الترشح لرئاسة النادي ومن بينها قضاء مدة عامين على الأقل كمنخرط للنادي وتكون مستوفاة وهذا لا يتوفر في المنفلوطي إضافة إلى أنه موقوف من طرف الجامعة الملكية المغربية لكرة القدم لمدة عام وما يساليها حتى لشهر يوليوز المقبل والجمع العام الانتخابي للرجاء غيكون يوم 26 ماي الحالي وبالتالي فهذا خيار مستحيل. وبالنسبة لعودة الرئيس الأسبق سعيد حسبان، فوضحت المصادر، أن حتى هذه الإمكانية رافضينها المنخرطين ماشي اعتراضا على الشخص ولكن حيث فيها خرق للقانون الداخلي د الندي، لان حسبان ما بقاش كيخلص الانخراط ديالو مدة هذه، وبالتالي فالقانون الداخلي واضح وغيطبقوه، وهذاكشي ديال جيب شيك وخلص الانخراط لمدة عامين باش تترشح لرئاسة النادي ما غيكونش هذه المرة، واللي بغى يترشح خاصو يكون ديجا منخرط لمدة عامين على الأقل، إضافة إلى أن الرجل لم يعبر بعد عن النية ديالو في الترشح لرئاسة النادي وكل ما يروج عن ذلك هو كلام بين شي منخرطين وعلى مواقع التواصل الاجتماعي.
