خدم فالميناج وغسل المواعن.. الريفي امرابط الرجولة منذ الطفولة!

محمد المباركواحد من اللاعبين اللي غادي يبقاو في الذاكرة ديال المغاربة، هو الريفي نور الدين امرابط اللي بيّن على قتالية وإصرار وحب للوطن منقطع النظير ودخل لقلوب المغاربة كاملين. نور الدين كان مقاتل من الصغر ديالو، هو تزاد سنة 1987 في هولندا من أبوين من الريف، وتحديدا من نواحي الناظور، بانت الموهبة ديالو في الكرة من الصغر، هاد الشي اللي خلى الأب ديالو يدخلو لأحد أندية الأحياء فاش صغير، ومن بعد شافو فريق أياكس أمستردام، اللي هو واحد من أكبر الأندية الهولندية والأوربية، دخلو معاه في فئة الصغار.قصة المرض والطرد من أياكس سنة 2000 امرابط غادي يتصاب بواحد المرض في الركبتين ديالو، وفريق أياكس غادي يتخلا عليه، وكانت غادي تسالي المسيرة ديالو في كرة القدم قبل ما تبدا، ولكن الإصرار ديال نور الدين والأب ديالو ما خلاهمش يفقدو الأمل ومشا التحق بأحد الفرق المغمورة في نفس المدينة. ومن أسوأ الحوادث المؤلمة أن الطفل نور الدين، اللي كانت عندو 13 سنة، كان كيدوز من حدا ملعب أياكس فاش كيبغي يمشي يتدرب واللي كان الحلم ديالو يلعب فيه. بقى مع داك الفريق وخدم باش يوفر لراسو شنو يحتاج، خدم فالميناج في مدرسة في هولندا، وغسل الأواني في مطعم. في سنة 2006 غادي يشوفو فريق "أمنيولوورلد" وغادي يوقع معاه وغادي يلعب في الدرجة الثانية، وتما غادي يرجع نور الدين للدراسة وغادي يقرا الاقتصاد، وفنفس السنة غادي يعيط ليه منتخب هولندا للشباب وغادي يلعب معهم.ظهور موهبة امرابط والتألقفي سنة واحدة فقط، وبالضبط 2008 غادي يشوفو فريق غادي يوقع أول عقد احترافي في الدرجة الأولى، من بعد ما ولى حديث الساعة كواحد من أحسن اللاعبين في الدرجة الثانية، وغادي يلعب عام ويمشي لفريق "بسفي ايندهوفن" واحد من أقوى الفرق في هولندا وغادي يدير واحد من أحسن الثنائيات مع المغربي ابراهيم افلاي.التجربة التركية و الإسبانية والإنجليزيةفي سنة 2011، غادي تبدا التجربة التركية، وغادي يمشي لفريق "كايسبور" التركي وفي نفس السنة غادي يلبي نداء المنتخب المغربي. غادي يلعب مع النادي التركي سنتين، وغادي يعيط ليه أحسن فريق في تركيا واللي هو غلطة سراي وغادي يلعب مع نجوم كبار في كرة القدم منهم ديديه دروغبا. وفي سنة 2014 نادي ملقا الاسباني كان دار ثورة في الفريق وكيجمع النجوم وختار امرابط، ومن بعد نقاشات طويلة غادي يجي للنادي الأندلسي على سبيل الإعارة ثم غادي يوقع عقد لمدة سنة. وفي سنة 2016 غادي يمشي في عقد طويل الأمد مع النادي الإنجليزي واتفورد، ومن بعد عام غادي يرجع للنادي الاسباني "ليغانيس" على سبيل الإعارة واللي باقي فيه لدابا.مع المنتخباتبالنسبة للمسيرة ديالو مع المنتخبات، نور الدين امرابط لعب مع المنتخب الهولندي للشباب وكان غادي يلعب حتى مع المنتخب الكبير، ولكن فاش عرف باللي عندو حق يبدل "الجنسية الرياضية " وأنه عندو الحق يلعب مع المنتخب المغربي مشا دفع طلب عند "فيفا" ولعب مع المنتخب المغربي، وقال في تصريح: "ما كنتش عارف واش عندي الحق نبدل الجنسية الرياضية، أما من الأول نلعب مع المغرب، حيث قلبي مغربي".طرائف امرابطنور الدين امرابط واحد من اللاعبين الأكثر دعابة، وعندو مشكل في تعلم اللغات، حيث كيعرف "تاريفيت" والهولندية فقط، فاش مشا أول مرة لتركيا بقاو شادين فيه صحابو في الفريق وكيفرضو عليه يهضر قدام القنوات بالإنجليزية وكان كيهضر بطريقة تضحك، وكذلك مع المنتخب المغربي دائما كان الضحية وكيقولو ليه هضر بالدارجة، وكيبقاو يضحكو، والجميل في الأمر أن نور الدين بعد نهاية المباراة كيهرب من وسائل الإعلام إلا الهولندية والريفية، ولكن في الأخير ولا كيقبل اللي كتهضر بالعربية وكتبقى دائما التصريحات ديالو كتخلق جو من المرح والدعابة.