بالدارجة.. حول الاغتصاب و الدفاع على النساء المغتصَبَات

كانبغي نقولكوم من هاد المنبر، أنني أؤكد لكم و أجزم أنه فهاد البلاد السعيدة، ما كايناش شي مْرا ما سبقلهاش تعرضات لاغتصاب! حيت الاغتصاب إخواني الكرام أخواتي العزيزات، ماشي هو عملية اختطاف هوليودية، و من بعدها كايقوم الجاني بتجريدك من ملابسك و أنتِ تُحرِّكين رأسك ذات اليمين و ذات الشمال بيدين مربوطتين، والاغتصاب ماشي هو يشدوك فغابة ولا فدار و يشدو عليك و يمارسو عليك الجنس!…
الاغتصاب هو أنك تكون راكبة فالطوبيس حتى تحسِّي بالزايد معاك و ملِّي دوري موراك تلقاي السيد اللي واقف موراك داير براسو ما مسوقش، الاغتصاب هو المدير ديالك يغازلك و يبينلك أنه يشتهيك بالسلطة اللي كايملكها عليك و ما تقدرش تصرفق مُّو حتى طير خنونتو! الاغتصاب هو تمشي تقضي شي غرض فشي إدارة و تضطر تصبر على النظرات ديال الموظف اللي كاتحيدليك حوايجك و تسكت باش تقضي غرضك و ما تقدرش تجبد القواقي دالعينين ديمَّاه…
الاغتصاب هو تكون جالسة فدارك و يدخل راجلك و يبدا فمعاشرتك و تبينلو و تقولو أنك ما باغاش و ما مستعداش و ما يديهاش فيك و تضطر تستسلملو حيت الملائكة بلا شغول و غايباتو يقيدولك باللي ما درتيش الخاطر لبوركابي، الاغتصاب هو تركب فطاكسي و يبدا الشيفور يدوز الڤيطاس و يقيص فيك بلعاني، الاغتصاب هو تكون مكونيكطيا ما بيك ما عليك و يجيك ميساج من عند شي حيوان بشري مصورلك العضو الذكري ديالو و يفرض عليك تشوفو حتى كاتبغي التقيا تخرجلك على نيفك!
الاغتصاب هو سبعين موقف فالنهار كاتعيشهوم أي مرا، و أي وحدة ما قادراش تقول باللي هادي حقيقة و عاشتها، ما تزيدش دافع على شي وحدة أخرى حيت هي ما قادراش دافع حتى على راسها!