ها علاش اعتزل هاشم البسطاوي التمثيل.. الأم ديالو كشفات عن سبب مؤسف

كشفات الأم ديال الفنان هاشم البسطاوي، اللي علن اعتزالو التمثيل مؤخرا على حسابو ف "أنستكَرام"، أن ولدها مايقدرش يتكلم فالتيليفون حيت مريض بزاف.
الوالدة ديال البسطاوي جاوبات "كود" فالرقم الهاتفي ديالو، وقالت: "ولدي ناعس فالسبيطار مايقدرش يهضر"، وكشفات انه مصاب بمرض "بهجت"، وهو مرض نادر كيتسبب فالتهاب الأوعية الدموية.
وفسؤال "لذات الجريدة، واش المرض ديال البسطاوي هو سبب قرارو فالاعتزال، قالت الأم أنها "ماعندهاش فكرة على الموضوع"، لكن من المرجح يكون المرض ديالو هو السبب.
وحيد البسطاوي كَاع تصاورو على مواقع التواصل الاجتماعي، وكذلك "أنستكَرام" اللي كتب فيه فستوري "أنا بريء أمام الله من كل الأعمال التي اشتغلت فيها، اسأل الله أن يغفر لنا جميعا، وكَاع الصور المنشورة اللي بغا يحيدها غادي نكون ليه من الشاكرين شكرا والله ولي التوفيق إخوتي".
وآخر بوست للبسطاوي فحسابو كان ف28 مارس، كتب فيه "السموحات لأي واحد قلقتو.. مسامح لأي واحد قلقني.. الله يسامح".
وكيتصنف هذ المرض اللي تصاب بيه البسطاوي على أنه مرض شامل كيقيس الجسم كلو، وكيؤثر على الأعضاء الداخلية بحال الجهاز الهضمي، والتنفسي، والعضلي الهيكلي، والدوران والعصبي. وكيمكن يتسبب فالموت نتيجة لتمزق الأوعية الدموية المتمددة "انيورسم" أو مضاعفات عصبية حادة.