شحال من بحر في كاسي

وكاسي باقي خاوي
شحال« أنا » تمنَّى
شحال« أنا »استنَّى
كان السحر الخافي وَلا كنّا
كنتْ شمعة تعرّيك
كنت رماد نسترك – مخبّي جمرة
كنا صورة على الورقة
ظل حالنا … وما عرفنا واش كنّا ؟
كنّا سِر والكتبة جاسوس
ما عرفنا واش كنا أو ما كنا ؟
………
………
مال لعناد جهة الضو
ما قفزنا من ظلنا
عرّانا الظلام وما بقى حد منّا
عزّينا الخسران ومشينا منا
تذاوبنا … في حضن المحال رحنا
عتقنا السؤال من صمتنا
واكتبنا بنا : راه غير احنا .
……….
……….
تخيليني سؤال حشمان
تخيليني حلمة مهرسة
تخيليني إشاعة جافلة
وما تتخيلينيش حاجبك بالشعا .
نصلّيو تحت شلال النور
نقراو في عينينا كلمة المرور
الكلام مرعوش والخيال مقطع السلاسل
لفعال يخدمونا والذاكرة تتسلطن
مديت يدي – قرات ما خفى .
………
………
الجذبة فكّت شعور الليل
النور ما طفى …
……..
……..
علاش ماء الروح احجبنا
علاش من ظلنا ما صفى ؟
……..
……..
نقدر نتسلَّفني منك
يقدر رضاك يسرّحني منك
يوشمني في الريح
تقدر تكون كتابتي عكاز
وانا باغيها تكون سفينة – في لهبال تسيح ،
نهربو بها … فينا
كلما بناتنا سور « واقعي
« نعاند ونطيح ،
نتفتَّت في الما
نشربْنا …. نسكر بِنا
نكونو لصلاة العشق تراويح .