وسط ظروف صعيبة.. الرجاء غادي يبداو يوجدو لماتش حسنية أكادير فكأس العرش

غيبدا الرجاء الرياضي يوجد للماتش ضد حسنية اكادير الأربعاء المقبل في ثمن نهائي كأس العرش، وسط أجواء صعيبة بسبب الأزمة اللي كيمر من منها الفريق.
وغيرجعو اللاعبين ديال الرجاء الرياضي للتداريب ديالهم اليوم الاثنين، ومن المنتظر يخوض الفريق حصة تدريبية تحت اشراف المدرب منذر الكبير بلاكاديمية ديال النادي نواحي بوسكورة مع العصر حيث التيران ما فيهش الضو الشي اللي كيخلي الفريق لا يتدرب بالليل.
الحصة التدريبية ديال اليوم هي الأولى للفريق من بعد الخسارة بثلاثية مع الفتح الرياضي السبت الماضي في البطولة الإحترافية، والفريق كيمر بمرحلة صعيبة بزاف حيث اللاعبين والطاقم التقني مازال ما توصلوش بالمستحقات ديالهم اللي كيطالبو بها الرئيس عزيز البدراوي والأخير عاجز أنه يلقى سيولة مالية باش يوفر لفلوس لتغطية حاجيات الفريق.