ماشي غير الجامعة بوحدها.. حتى الوداد غادي يربح الدولار من تأهل المنتخب لدومي فينال المونديال

غادي ينعش الوداد الرياضي الخزائن ديالو بمبلغ مالي مهم من بعد المشاركة المشرفة ديال المنتخب الوطني المغربي فكأس العالم قطر 2022، واللي مساهمة فيها الحمرا بثلاثة اللعابا.
الوصول ديال المنتخب الوطني المغربي لنصف نهائي كأس العالم، والمشاركة ديال كل من يحيى عطية الله ويحيى جبران ولكول رضا التكناوتي، اللعابا ديال الوداد مع ليكيب ناسيونال فلوصول هاد الدور، غادي يخلي بطل المغرب وإفريقيا يستافد من 960 ألف دولار.
والوداد هو الفريق المغربي الوحيد اللي غادي يستفد، حيث الوحيد من البطولة الإحترافية اللي عندو لعابا فالمنتخب الوطني المغربي حاليا فكوب ديموند.
هاد المبلغ اللي هو عبارة عن تعويض بدا كيعطيه الاحاد الدولي لكرة القدم الفيفا من مونديال 2018، للأندية على مشاركة لاعبيها فكأس العالم وكيتزاد مع التقدم فالأدوار، غادي يكون قابل للزيادة فحالة تأهل المنتخب الوطني المغربي إلى النهائي،سوا كان وصيف أو بطل أو فحالة احتل المركز الثالث، مع العلم أن الوداد هو 4 فريق فدومي فينال كوب ديموند من ناحية عدد اللعابا واللي متواجدين مع منتخباتهم فهاد الدور متفوق على فرق عالمية كبيرة.