الحصيلة غادا في ارتفاع.. الفرقة الوطنية مزال كتطيح في ريزو الطاشرون الكازاوي وها التفاصيل

السطو على الاراضي فكازا مزال تيطح فالمتورطين فهذا الملف الخانز.
فبعد توقيف الطاشرون المعروف شقيق برلماني٬ وموثق كازاوي خدام مع الشركة =ي س= بمطار محمد الخامس الدولي بعدما كانو مسافرين خارج ارض الوطن، كشفات مصادر "كود " ،ان عناصر الفرقة الوطنية لشرطة القضائية بكازا تمكنت اليوم من توقيف جوج سماسرية وذلك بعدما نصبت لهم كمين بالاضافة الى اخضار متهم خامس من سجن عكاشة من اجل التحقيق معهم على خلفية ملف لهريف ديال الاراضي .
المصدر تيضيف ان الجميع دبا راهم فمقر الفرقة الوطنية بشارع الروداني من اجل التحقيق معهم بعدما بنيات التحقيقات فهذه الارض ديال الوراثة اللي هرفات عليها مافيا السطو على عقارات الغير بتزور الوثائق ديال الارض .
هذا القنبولة تفرعات بعدما تقدمت مرا تتنوب على الوراثة بشكاية كتقول باللي تم تزوير وثائق ديالها باش يبيعو ارضها.