حصري.. من بعد الكونفرساسيون لي طيحات اساتذة سطات.. ها كونفيرساسيون جديدة غادي طيح شيفور ديال النقل المدرسي تحرش بتلميذة عندها 14 العام

هاد سطات مغاداش تسالي من هاد المصائب، فمن بعد الكونفيرساسيون لي طيحات أساتذة جامعة الحسن الاول فقضية مايعرف دابا ب"النقط مقابل الجتس"، "گود" جابت كونفيرساسيون جديدة ديال شخص جابد حجرو في واتساب لتلميذة قاصر عندها 14 العام وكيتحرش بها عن بعد.
وحسب الكونفيرساسيون لي توصلات بها "گود"، فكترجع لشيفور ديال الطرونسبور سكوليغ تابع لجمعية القراقرة للنقل المدرسي العمومي و عندو اكثر من 40 عام.
هاد الشيفور تفرش مباشرة مني التلميذة مشات قالت هادشي لعائلتها، وتقدمات العائلة بشكاية لعند الجدارمية ديال سطات، وقدمات ليهم الكونفيرساسيون.
منين بداو الجدارمية التحقيق في الملف، الشيفور اعترف بالفعلة ديالو وبدا كيطلب الملف يتطوى وطلبهم باش ميتابعوهش قضائيا باش "مايتشوهش".
هاد السيد عندو سوابق فهاد السلوك المنحرف، ودابا خاص النياية العامة تحيل الملف على الفرقة الوطنية للشرطة القضائية فالدار البيضاء باش توقفو عند حدو.