العرايشي فاتح كونكور للتوظيف والصحفيين ديال "الرياضية" كاعيين.. مصدر من القناة ل"گود": كاينين ناس خدامين هادي اكثر من 12 العام بلا ترسيم وكنتخلصو غير 3 ديال المرات فالعام

كلشي كيبارطاجي الكونكور جديد ديال التوظيف اللي فاتحاه الشركة الوطنية للاذاعة والتلفزة ومسينيه طبعا الجنرال فيصل العرايشي، وكلشي باغي يدوزو.
مصدر " كود "، قال أن المشكل ماشي هنا، المشكل هو الاكراهات العديدة لي كاينة فالشركة الوطنية للإذاعة والتلفزيون من نهار جا العرايشي مدير عام، كاين ناس كيضربو تمارة بالليل والنهار ومكيتخلصوش فالوقت، واخطر من هاد الشي كاين لي ضارب 14 العام وباقي ماترسم.
واضاف مصدر "گود" من داخل قناة الرياضية: كاينين العشرات من الصحفيين والتقنيين خدامين اكثر من 12 العام ومازال مابغاوش يرسموهم.
واكد ذات المصدر ان الفضيحة الكبيرة هي ان الصاليرات كيدوزو من 4 اشهر ل4 اشهر ، اي ان هاد الناس كيتخلصو غير 3 ديال المرات فالعام وبصاليرات طايحة بزاف.
قبل توظيف ناس اخرى، واش هاد الصحفيين ماشي خاصهم بعدا يترسمو؟ راه حشومة هاد الشي لي كيوقع في دار البريهي.