اكثر من 66 ألف أرور كانت داخلة للمغرب بلا تصريح من الديوانة.. لقاوها فميناء طنجة المتوسط عند مغربي عايش فالطاليان

حصلات الديوانة فميناء طنجة المتوسط البارح الإثنين شي مواطن مغربي عايش فالطاليان وبحوزته فلوس صحيحة بالعملة الأجنبية ومعندويش تصريح عليها من الديوانة باش تدخل بلادنا.
القيمة ديال هاد لفلوس المحجوزة وصلات ل66 ألف و350 يورو ، بالإضافة إلى 3 ديال الشيكات بنكية وصلات القيمة الإجمالية ديالها 300 ألف درهم، وذلك على متن طوموبيل خفيفة مرقمة بإيطاليا فملكية شي مواطن مغربي عايش فالخارج.
مول هاد لفلوس، حسب مصدر من الديوانة، كان صرح باللي عندو غير 1500 أورو، لكن مني دارو ليه التفتيش فالطوموبيل بشكل دقيق لقاو فلوس إضافية صحيحة وشيكات بنكية ممصرحش بها حتى هي.
دبا تقرر باش يتحال على فرقة الشرطة القضائية فالميناء المذكور باش تدير معاه لونكيط فهاد القضية بتعليمات من النيابة العامة المختصة.