فيه الريسك على اللي كيحاولو يقلدوه.. نايضة عاوتاني على "تيك توك" وهاد المرة بسباب تشالنج خاص بالشطيح

كيدور واحد التشالنج ديال الشطيح ف"تيك توك"، ممكن يكون خطار على الناس اللي ماشي بروفيسيونال وكيحاولو يقلدوه، ويقدر يتسبب ليهم فإصابات اللي تبقى معاهم حياتهم كاملة.
تحدي الشطيح اللي معروف ف"تيك توك" ب"Footloose Drop" (بحال شي سقوط حر)، حذرات منو الأكاديمية الملكية للرقص فبريطانيا وقالت بللي خاص الناس يحضيو ويردو البال مللي يكونو كيحاولو يديروه.
جورنال "The Guardian" البريطاني، نشرات تصريح ديال المدير الفني للأكاديمية، جيرارد تشارلز، قال فيه بللي واخا "تيك توك" كتساهم بالتشجيع على فن الشطيح لكن كاينين شي شطحات اللي ممكن تتسبب إصابات لغير المحترفين، لذلك خاص يتنشر تحذير ونصائح مع بحال هاد التحديات.
وقال الجورنال بللي تعلم الشطيح بلا مدرب بروفيسيونال كيأدي لأخطاء فحركات الجسم واللي ممكن تتسبب فمشاكل عضلية وإصابات اللي يقدر يبقى التأثير ديالها مدى الحياة.