محسوبين على فصائل ال"إلتراس" قربلوها فحي "الأندلس" فكازا.. البوليس قرقب على 9 فيهم جوج براهش

البارح الجمعة أسفرت العمليات اللي داروها بوليس منطقة أمن الرحمة فكازا، عن توقيف 9 أشخاص، وفيهم جوج قاصرين، يشتبه فتورطهم فتبادل العنف اللي عندو علاقة بالشغب الرياضي وحيازة جناوة فظروف من شأنها تعريض سلامة الأشخاص للخطر.
وكان البوليس فكازا توصل بإشعار على تورط مجموعة من الأشخاص، يشتبه فكونهم عندهم علاقة بفصائل مشجعي أندية كرة القدم، فتبادل العنف والتشيار بالحجر فحي "الأندلس" بمنطقة الرحمة، وهو ما استدعى تدخل دوريات البوليس اللي تمكنات من توقيف 9 أشخاص من بين المشتبه فيهم، واللي لقاو عندهم أسلحة بيضاء.
هادو اللي تشدو دبا، الكبار فيهم تدارو فالحراسة النظرية فيما تم الاحتفاظ بالموقوفين القاصرين تحت تدبير المراقبة رهن إشارة البحث اللي تكلفات بيه فرقة الشرطة القضائية فمنطقة أمن الرحمة بإشراف من النيابة العامة المختصة، فالوقت اللي مزال الأبحاث والتحريات جارية بغرض توقيف باقي المتورطين في ارتكاب هذه الأفعال الإجرامية.