التقارب المغربي الموريتاني كيزيد يعزل نظام عسكر الدزاير فالمنطقة.. بوريطة وولد مزروكَ ناقشوا ملف الصحرا فالرباط

استقبل وزير الشؤون الخارجية والتعاون الإفريقي والمغاربة المقيمين بالخارج ناصر بوريطة البارح فالرباط، نظيرو الموريتاني محمد سالم ولد مرزوكَ.
الجانبان دارو مباحثات كتهم العلاقات الثنائية بين البلدين وآفاق تطويرها، وتبادلو وجهات النظر على الملفات والقضايا الإقليمية والدولية ذات الاهتمام المشترك وفمقدمتها الضوصي ديال الصحرا.
لقاء وزير الشؤون الخارجية المغربي مع نظيرو الموريتاني، كان على هامش مشاركة هاد الأخير ممثلا لبلاده فالاجتماع الوزاري للدول الإفريقية الأطلسية اللي منظم فالمغرب.
مشاركة موريتانيا فالاجتماع الإقليمي المذكور، عكسات حرص نواكشوط على الانخراط فالمبادرات اللي كيقودها المغرب وسط القارة الإفريقية، بحال الاجتماع الوزاري للدول الإفريقية الأطلسية، اللي كتشارك فيه 21 دولة إفريقية اللي على واجهة المحيط الأطلسي، وهي مبادرات هدفها تعزيز العلاقات بين البلدان الإفريقية، وتوحيد جهودها فمواجهة التهديدات والتحديات المشتركة.
هاد الانخراط الموريتاني كيأكد أيضا جودة العلاقات اللي كتربط المغرب وموريتانيا، وحرص هاد الأخيرة على التعاطي الإيجابي مع كل جهود تعزيز علاقات البلدين، والقطع مع كافة التوجهات المعادية لمصالح المملكة المغربية وأمنها ووحدتها الترابية.