ها تفاصيل الحكم فالدعوى اللي رفع جوني ديب ضد طليقتو آمبر هيرد – فيديو

نجح الممثل الميريكاني جوني ديب في ربح دعوى التشهير بقيمة 50 مليون دولار ضد مراتو السابقة آمبر هيرد بسباب اتهامات وجهاتها ليه بالاعتداء عليها وتعنيفها فاش كانو أونسوبل.
هيئة محلفين مدنية فميريكان، واللي مكونة من 7 أشخاص فولاية فرجينيا، قالت أن هيرد "شوهات سمعة راجلها السابق"، بعدا كتبات عليه مقال رأي الجورنال "The Washington Post".
وغادي ياخد ديب، على حساب الحكم اللي خرج، تعويضات على الضرر كتوصل قيمتها ل10 ملايين دولار وتعويضات تأديبية ب5 ملايين دولار، علما أن المحامين ديالو كانو كيطالبو بمبلغ 50 مليون دولار.
أما آمبر هيرد فغادي تاخد بناء على نفس الحكم تعويضات على الضرر قيمتها جوج ديال المليون دولار، وبلا تعويضات تأديبية، مقارنة بمبلغ 100 مليون دولار اللي طلباتو فالدعوى المقابلة لدعوى طليقها ديب.
وهاد الحكم المذكور فالوقت اللي فرحو بيه الناس اللي "تعاطفو" مع جوني ديب، بقدر ما كعاو عليه عدد من المتتبعين خصوصا من حركات الفيمينيزم اللي قالو بللي مامقبولش التشكيك فأقوال ضحايا الاعتداءات الجنسية والعنف المنزلي غير هكا بسهولة وتحت تأثير بهرجة إعلامية خاوية اللي تسببات لآمبر هيرد فموجة خايبة من التنمر والإهانات عبر مواقع التواصل الاجتماعي، حسبهم.