حماية المعطيات الشخصية فالمغرب مشات فالرجلين.. فرملية تزعطات فكَاوري فالمطار وخدات نمرتو وبقات تصيفط ليه فالميساجات -تغريدات

صحافي بريطاني سميتو اليوت داربي خدام في BBC ضرب الطر لفرميلية مغربية دارت ليه التيست ديال كورونا في شي مطار في المغرب، والزعطة خلاتها تاخد نمرتو من الملف الطبي وتسيفط ليه ميساج في الواتساب باش تعبر ليه على الاعجاب ديالها به.
الصحافي حط سكرين شوت من المحادثة مع الفرملية، ولي جاتو فاص وقالت ليه أنه عجبها وبغاتو يتزوج بيها، بعدما تأكدات أنه مامزوجش، غير هو قال ليها أن الزواج خاص يكون بعد التعارف وماشي باش جاي باش داير.
ما علينا، القصة ديال التعبير على الاعجاب والزعطة ما فيها عيب، غير المصيبة هي كيفاش فرملية ماحتارماتش الخصوصية ديال الراجل، وكملاتها وجملاتها بأنها خدات رقم شخص وتاصلات به.
هاد القصة كتخلينا نفكرو في حماية المعطيات الشخصية، وواش نقدرو مستقبلا نبقاو نخليو معلومات ديالنا بين يدين ناس غير مسؤولين، ويقدرو يخلقو مشاكل كبيرة.
تويت ديال الصحافي انتاشر والفرملية غادي تعرف عاجلا أم آجلا وديك ساعات غادي تحاسب وتشوف الزعطة فين غادي تخرجها.
السكرين ديال الفرملية دار العالم وبارطاجاه كثر من 400 واحد ودابة ولات هي حديث الصفحات ديال التبركيك في الانستكَرام.
غالبا الغباء كتكون النتيجة ديالو هي الشوهة.
Things were moving a bit too fast, so we've called it a day. ????
Good news, I did get clarification that I tested negative on arrival to Morocco. Not that it really makes a difference because that was 12 days ago, and I've been back home in the UK for 5 days now. ???? https://t.co/fb9aPqRrem pic.twitter.com/u4XLHXgsLN
— Elliot Darby (@elliotdarby) May 19, 2022