ممثلة الحكومة الإسبانية فسبتة شعلات العافية بسباب تصريحاتها على فتح الحدود نهار قبل ما يتلاقا سانشيز بالملك محمد السادس

شعلات ممثلة حكومة إسبانيا فسبتة، سالفادورا ماتيوس، العافية بسباب تصريحاتها اللي توصفات بالعنصرية ضد المواطنات المغربيات اللي كيخدمو فالديور ديال سكان سبتة، وكيجمعولهم وكينقيو ديورهم.
سافادورا، قالت بللي هي فرحانة بعودة العلاقات بين بلادها والمغرب، والحاجة الوحيدة اللي كتستناها من فتح الحدود بين البلدين، هو رجوع المغربيات ينقيولهم ديورهم، بحيث هي وحدة من ربات البيوت اللي مابقاتش قادرة توفق فحياتها بسبب خدمتها خارج الدار.
التصريحات ديالها تفاعلو معها نشطاء مغاربة، ووصفوها بالعنصرية، وجات فالوقت اللي كلشي كيتسنى زيارة رئيس الحكومة الصبليونية غذا للمغرب، باش يتلاقا بالملك محمد السادس وعزيز أخنوش رئيس الحكومة المغربية، باش يطرحو المشاكل ديال البلدين ويلقاولها حل للأزمة اللي كانت.