عاماين ديال الحبس لنور الدين لعواج

حكمات المحكمة الابتدائية الزجرية فعين السبع، اليوم الخميس، على الناشط نور الدين لعواج، بعاماين ديال الحبس النافذ، بتهم "إهانة مؤسسات دستورية" و"إهانة هيئات منظمة"، و"التحريض على ارتكاب جناية".
وفمواقع التواصل الاجتماعي استنكار كبير فصفوف النشطاء والحقوقيين بسباب الحكم على لعواج، اللي اعتبروه سافر وفيه ظلم كبير، وطالبو النشطاء بإطلاق سراحو.
وكانت أمرات النيابة العامة بمتابعة لعواج فحالة اعتقال، من بعد ما دوز 48 ساعة حراسة نظرية، وكان تشد فوقفة احتجاجية تضامنية مع الصحافيين المعتقلين، عمر الراضي وسليمان الريسوني.
وتدارو وقفات كثار مع العواج امام محكمة عين السبع وقدام عكاشة، حضرو فيها انصار الصحافيين الراضي والريسوني، واعضاء من لجنة التضامن معهما، بما فيهم عائلتهم.
وكان تشد العواج، خلال وقفة قدام محكمة الاستئناف فكازا، للمطالبة بإطلاق سراح الصحافي الريسوني.