مكتب محاماة بلجيكي: السلطات المغربية اعتقلات محامي دولي قررات ترحيلو حيت بغا يحضر لمحاكمة الراضي والريسوني – فيديو

كشفات شركة المحاماة JusCogens فبروكسل اعتقال المحامي البلجيكي الدولي كريستوف مارشان من طرف السلطات المغربية، باش يتم ترحيلو لبلادو.
وزادت الشركة، فبيان ليها، أن المحامي المعني جا لبارح للمغرب باش يحضر محاكمات الصحفيين المعتقلين عمر الراضي وسليمان الريسوني، لكن تم اعتقالو مع 9 ديال العشية، بمجرد ما وصل للرباط.
وكان عوال يحضر المحامي لجلسات اليوم الثلاثاء 29 يونيو 2021 فكازا، وهكذا خبراتو السلطات بأنه مايمكنش يدخل للتراب الوطني، وتقرر ترحيلو على الفور، حسب JusCogens.
وقالت شركة المحاماة انه دوز الليلة فكرسي فمنطقة العبور، وتصادر الباسبور ديالو، وغيتم ترحيلو من بعد.
وحط المحامي فيديو ليه من مطار محمد الخامس الدولي فكازا على حسابو ففيسبوك، كيهضر فيع على الحالة "المكرفصة" اللي هو فيها فالمنطقة الحدودية فالمطار، وانه جا باش يحضر لجلسة محاكمة الصحافي عمر الراضي.
https://m.facebook.com/story.php?story_fbid=2892874170924848&id=100006068792812
وبعد ما وقع ليه، وجه المحامي المعني نداء عاجل للمقرر الخاص بالأمم المتحدة المختص باستقلال القضاء والمحامين، باش يخلي المحامي يدخل للمغرب ويمارس المهام ديالو تماك.