النويضي بعد زيارتو لمنجب ف الحبس: باقي داير الإضراب على الماكلة وخسر 5 كيلو

كشف عبد العزيز النويضي، محامي المؤرخ والحقوقي المعتقل المعطي منجب، أنه زارو، اليوم الجمعة، فالحبس هو والنقيب عبد الرحمان بنعمرو، وأنه باقي مستمر فالإضراب على الماكلة من 4 مارس، وخسر بهذشي 5 كيلو.
وصرح المحامي، فرسالة ليه توصلات بيها "كَود"، أن منجب كيستافد من زيارة طبيب ليه جوج مرات ف النهار، لكنه واخا هكاك محتاج لطبيب ديال القلب.
ومنجب، حسب النويضي، باقي مصر على معارضة الحكم الصادر فحقو نهار 27، حيت كيقول انه تحكم عليه غيابيا، وماتعلمش لا هو ولا محاميه بمحاكمة 20 يناير، وهذشي اللي كياكدو النويضي بدورو، فالرسالة دائما.
ومنجب كشف للمحامين ديالو بجوج أن ختو، فاش مشات تشوفو للمرة الأولى، تبعاتها طوموبيل دالبوليس من بنسليمان حتى للحبس.
وكشف منجب على وزارة اللجنة الإقليمية للمجلس الوطني لحقوق الإنسان ف11 مارس، للاطلاع على أوضاعو بالحبس.
وختم النويضي رسالتو بسؤال طرحاتو هيئة دفاع منجب هو: علاش ماحضرش للمحاكمة وعلاش ماتمتش متابعتو ف حالة سراح؟ واخا عندو جميع ضمانات الحضور؟ وكان مشا لفرنسا ورجع باش يبين براءتو قدام القضاء المغربي، وهذ الاعتقال "كانت عقوبة بدون محاكمة عادلة ومنصفة"، على حساب هضرتو.