قال سعيد معاش، رئيس نادي المحامين بالمغرب، أن الهيئة مادارت حتى جمع عام تم فيه انتخاب رئيس جديد، والمحامي مراد العجوطي "هو اللي جمع محامين ماعندهم حتى علاقة بالجمعية، ومنهم متمرنين ومتدربين، ووهمهم بأنه كاين لقاء مع النقيب، حتى جاو وتفاجؤو بالجمع العام"، كيف قال. وكشف معاش، فتصريحو ل"كود"، أن العجوطي خدام معاه أسيسطون فالمكتب، وماشي بزاف باش التحق بالنادي، و"هذشي بين الزملاء ماكيدارش حيت حسيت بحال إلى طعني بخنجر وسط ظهري… وانا مابغيتش ننفعل ونجاوب لبارح منين شفت الخبر، حتى تشاورت مع الزملاء اللي كلهم ساقو الخبار بالصدفة وجاهم غريب"، على حساب تعبيرو. وحتى اللي حضرو راهم اقلية والاغلبية ما تعلماتش٬ يضيف معاش ل"كود". وزاد أنه خلال هذ الجمع العجوطي تكلم بسميتو مع متدربين قالو كيعرفوه غير بتصاورو وعمرهم تلاقاوه، وغرر بيهم وقنعهم باش يصوتو عليه ويرجع رئيس دالنادي، كيف استعمل علاقاتو مع وسائل الإعلام باش ينشر الخبر، حتى ف"لاماب"، اللي قال معاش أن عندو علاقة طيبة معاها، وكيعرفوه وكيحترموه وهذشي استغلو العجوطي. وأكد أن العجوطي ماعندوش الحق يترشح، حيت خاصو يكون من الأعضاء المؤسسين فهذ 10 سنوات الأولى، "بصراحة مابغيتش نستعمل مصطلحات كثر باش نوصف هذشي اللي دار، خصوصا وأنني تبنيتو فهذ المهنة حيت ضروري إلى كنتي جديد كيخص شي حد قدم منك يوريك، وفاش تكون مسط دارك صعيب تضرب خوك…"، على حساب هضرتو.
