تأجيل محاكمة الريسوني.. ومحاميه ل"كود": التسجيل كان لإعداد الدفاع.. وتقدمنا بملتمس السراح غتبت فيه المحكمة اليوم

قررات غرفة الجنايات الابتدائية بمحكمة الاستئناف فكازا تأجل محاكمة سليمان الريسوني حتى ل2 فشهر مارس
المحامي محمد المسعودي، صرح ل"كود" أن هيئة الدفاع دالريسوني، حطات ملتمس دالسراح المؤقت، اللي غتبت فيه اليوم فالعشية، خصوصا وانه تعتقل احتياطيا هذي 9 أشهر، فيحين ماكاينش مبرر قانون كاين كل الضمانات ديال حضورو للجلسات، كيف كيشوفو المتضامنين معاه.
وزاد محامي الريسوني أن السبب ديال التأجيل راجع لتسجيل محامين جداد النيابات ديالهم، وطلب مهلة بالتالي لإعداد الدفاع.
وكشف المسعودي أن سليمان حضر، فيحين الطرف المشتكي ماحضرش وجا غير الدفاع ديالو.
وتزامنا مع جلسة اليوم، كانت وقفة احتجاجية قدام محكمة الاستئناف، للمطالبة بإطلاق سراح الريسوني، شاركو فيها عائلة الريسوني والصحافي عمر الراضي، المعتقل فملف آخر معروض على القضاء، وكذلك صحافيون خرين وحقوقيون.
ويتابع الريسوني بتهمة "الاحتجاز وهتك العرض بالعنف" فحق ناشط فحركة لمجتمع المثليين والعابرين جنسيا والكوير "الميم عين".