وا وزير الصحة راك شوهتينا وبزاف وراه خاصك تتحاسب قبل ما يجريو عليك. وا الاردن الاردن بدات الڤاكسان: دارت "سينوفارم" و"فايزر"

دابا واش هاد خالد ايت الطالب وزير الصحة كيضحك علينا من رئيس الدولة حتى اصغر مواطن. كيفاش طلق وعود وجا فبيان الديوان الملكي نهار 9 نونبر باللي اللقاح قريب فالاسابيع المقبلة ودابا دازت 10 سيمانات ووالو. كل مرة كيطلق مبرر اكثر غباء من السابق.
دابا ولات الاردن كتسبق المغرب. اييه الاردن والشوهة لكبيرة ان هاد البلاد وصلاتها كميات من ڤاكسان "سينوفارم" الصيني و"ڤايزر" اللي محتاج ل70 درجة تحت الصفر وقالو لينا فبلادنا ما عندهاش الامكانيات والاردن عندها.
مدير مدير عمليات خلية أزمة كورونا في الأردن، مازن الفراية، قال٬ وفق جريدة "الدستور" الاردنية٬ البارح باللي اليوم الاربعاء غترسل 10 آلاف ميساج للي تسجلو فبلات فورم باش يدار ليهم الڤاكسان، وقال باللي غاديين يديروه اليوم وغدا الخميس.
وحنا عاطينا هاد الوزير القرنابي. ولكن ما لقى لا معارضة لا غيرها باش تجرجرو باش تحاسبو باش دفعو يخلص على تدبيرو الكارثي من النهار الاول حتى اليوم لملف كورونا فيروس بالمغرب.