هي أول دولة كديرو. بريطانيا بدات اليوم التلقيح بڤاكسان أسترازينيكا اللي شرا المغرب

بدات بريطانيا تستخدم لقاح "أسترازينيكا/أكسفورد" البريطاني ضد كوفيد 19، اليوم الاثنين، وبهذشي كتكون أول دولة فالعالم كتعتمد هذ اللقاح.
وزير الصحة البريطاني قال، فهذ الصدد، أنه فرحان بإطلاق اللقاح اللي جا "بفضل جهود العلم البريطاني، باعتبار أن ذلك يشكل تحولا في كفاحنا ضد هذا الفيروس الرهيب"، حسب تعبيرو.
وكيتعتبر هذ اللقاح أقل كلفة وأسهل فالتخزين، وبهذشي غيكون أكثر تكيفا مع حملات التلقيح على نطاق واسع بالمقارنة مع لقاحي "موديرنا" و"فايرز/بايونتيك".
وكان سبق لمليون بريطاني خداو لقاح "فايرز/بايونتيك" فدجنبر اللي فات.
ولقاح "أسترازينيكا/أكسفورد" هو اللي غيعتمد عليه المغرب فحملة اللقاح ديالو، بالإضافة للقاح "سينوفارم" الصيني.