فضيحة النصب باسم الصحافة. القاضي الخضراوي طلع معلم. باش يسد الباب على الودادية استاقل منها وبعدهم على الملف وركز على الباقي

الودادية الحسنية للقضاة دارت بيان السبت اللي فات بعد اجتماع ليها. هاد البيان فيه معلومة وحدة وهي انها قبلات استقالة لقاضي محمد الخضراوي. برراتها بالحفاظ "على سمعة الودادية ومبادئها ووحدتها".
واوضحت باللي "صرفات النظر عن تطبيق المقتضيات التأديبية المنصوص عليها في المادة السابعة من قانونها الأساسي فحق الخضراوي.
دابا الخضراوي ماشي اي قاضي. راه نائب رئيس الودادية وكان اكبر مرشح باش ياخد الرئاسة. نسيب عبد الاله بنكيران٬ حقاش مزوج ببنت كانت بمتابعة البنت لرئيس الحكومة٬ طلع ذكي.
اولا حقاش قرا باش تسبو محاضر كتهم عصابة النصب باسم الصحافة انو هو المستهدف الاول. كلشي اللي خرج لحد الان باش يقطع عليه الطريق للترشح.
هو عارف منافسيه شكون. عارف اللي كيتحرك باش ما عمرو يوصل لرئاسة الودادية. حرب وصافي.
بهاد الاستراتيجية دار الخضراوي تحييد للودادية. حقاش كانت تقدر تغرقو. عندها لجنة كينص عليها القانون الاساسي مهمتها البحث وإعداد تقرير بشأن الوقائع المعروضة عليها فهاد القضية.
فسياق الحروب كان ممكن هاد اللجنة تغرقو قبل ما يبث القضاء فكاع التهم اللي جات على لسان اطراف قضية "النصب باسم الصحافة". وعليه هو غادي يكون شايف هاد الفيلم وعارف باللي المشكلة الاساسية هي الودادية وقرر يخليها تعبد ويركز علي الباقي.
هاد القضية كانت تفجرات بعد ما تقدم ملايري عا تاجا اسمو احمد الطرمباطي بشكاية على ابتزاز صحافيين فقضية قديمة معروضة امام القضاء بينو وبين رجل الاعمال سعيد بنشرقي مول "بروديك للصباغة".
القضية تخلطات وعوض ما تبقى رشوة وابتزاز تجبدو اسماء قضاة منهم الخضراوي. اللي قرا اللي خرج من المحاضر او جزء من محضري صحافي علاش تيفي" القاسمي محمد وهاداك الطرمباطي نيت٬ كيبان شكون المستهدف.
القضية ايلى كملات غادية تكشف شبكة كبيرة بزاف. هادوك اللي متهمين اليوم من القضاة يقدرو كلهم غير ضحية حسابات وحروب داخلية.
راه قالها قاضي مستقل فصرخة سابقة ل"كود". راه خاص كلشي يريب ويتحيدو كاع جمعيات تتكلم باسم القضاة باش تبدا صفحة جديدة.