ها علاش قرار رئيس الحكومة باش يمنع الوزرا والمسؤولين يدوزو عطلتهم هنا: غير طلقات برا وبدا الهروب البورجوازي الكبير وكاع الطيارات لباريس لكوسطا ديل صول عامرين

كثار ضحكو على رئيس الحكومة اللي هو فالحقيقة ديال الضحك٬ على قبال اصدارو لمنشور لزم فيه "جميع أعضاء الحكومة ومختلف المسؤولين بقضاء عطلهم داخل المغرب". القرار غادي يبقى حتى نهاية هاد العام واخا تفتح الحدود. هاد الشي وفق ما قالو الناطق الرسمي باسم الحكومة وزير التربية والتكوين سعيد امزازي دار باش يوقع الرواج.
هادا راه قرار مهم. راه مئات الموظفين فالدولة كيخرجو لبرا باش يدوزو عطلتهم وكيخسرو بزاف. دابا تحدات ليهم.
ياك المغرب قرر باش ما يخرج منو لحد الان الا الطلبة ورجال الاعمال لاسباب مهنية وللي مراض وباغيين يتعالجو٬ وشوفو طولو علي رحلات المغرب لكوسطا ديل صول =مالقا= ولا باريس هاد اليومين. طيارة من 160 بلاصة عامرة. كومبلي.
يعني مغاربة كثار لقاو كيفاش يتحايلو على القرار وخرجو برا. هادو عندهم امكانيات مالية كبيرة وغاديين يخرجو الدوڤيز اللي محتاجينو بزاف دابا.
لارام غادية دير شوية الرواج ولكن الاقتصاد غادي ياكل لعصا ايلى خرج كل واحد لفلوس وعندهم الف طريقة باش يديروها.