رسميا.. الاتحاد الأوروبي غيفتح حدودو الخارجية مع المغرب ابتداء من يوليوز

قرر الاتحاد الأوروبي، بشكل رسمي، يفتح الحدود الخارجية ديالو مع المغرب ابتداء من فاتح يوليوز الجاي.
الاتحاد قرر الحدود تتفتح مع 14 دولة فقط فهذ المرحلة، لتجنب استفحال فيروس كورونا المستجد مجددا فالدول الأوروبية، وبالتالي وقع الاختيار على الدول اللي مامنتشرش فيها الفيروس بزاف، واللي هي أستراليا وكندا وكوريا الجنوبية واليابان ونيوزيلندا ورواندا والأوروكَواي والتايلاند وجورجيا وصربيا والجبل الأسود، ثم تونس والجزائر والمغرب.
القرار، اللي خرج بيه الاتحاد الأوروبي لبارح بالليل، غادي يكون بداية لاستئناف رحلات الطيران لهذ الدول، وهذشي حسب كل دولة فيه واش غادي تفتح حدودها فنفس التاريخ أو لا، وهذشي كينطبق كذلك على الدول الأوروبية اللي تقد تستانف الرحلات فوقت آخر.
ومصادر موثوقة كشفات أن المغرب غيستانف الرحلات ديالو إلى الخارج ابتداء من 10 يوليوز، وشركات الطيران المغربية، وخصوصا الخطوط الملكية المغربية (لارام) بدات كتستعد لهذشي من دابا.