فين وصل المغرب فهادشي ديال تيستات كورونا.. رئيسة قسم الميكروبيولوجيا فابن رشد ل"كود": المغرب كيجرب التحليلات السريعة ديال الدم باش يشوف واش فعالة.. وباقيين غيزودونا بدفعة جديدة من أجهزة PCR

كشفات بروفسور نعيمة المدغري رئيسة قسم الميكروبيولوجيا وعلم الجراثيم فسبيطار ابن رشد فكازا، بللي المعهد الوطني للصحة فالرباط خدام كيتيستي فالأجهزة الجديدة ديال التحليلات السريعة ديال فيروس كورونا المستجد، واللي كتدار عن طريق الدم.
ولحد الساعة، كتقول المدغري، فحوار مع "كود" غيتنشر لاحقا، بللي هذ التيستات ماشي فاليدي على الصعيد العالمي، وفعاليتهم مشكوك فيها لحد كبير، وحتى النتائج اللي توصل بيها معهد الصحة كتبين أنهم غير فعالين بشكل دقيق، لكن مازال كيجربو تيستات سريعة أخرى ممكن تكون مزيانة، ويقدرو المختبرات بجوج والمستشفيات الجامعية يعتامدوهوم إلى جانب تيستات PCR اللي كيخدم بيها المغرب دابا.
وأكدات المدغري بللي وزارة الصحة قريب تزود مستشفى بن رشد، بالإضافة لمستشفيات أخرى، بأجهزة PCR جديدة للكشف على الفيروس، وهكذا غترفع من الطاقة الاستعابية ديال السبيطار باش يولي يدير تحليلات كثر، فانتظار الحسم فالتيستات السريعة اللي كيخرجو النتائج ديالها ف10 دقائق فقط.