علاش الحكومة مازال ما لقاتش الحل للمغاربة اللي حصلو برا؟. مصدر ل"كود": الموضوع بيد جهات عليا والفرج قريب

الحكومة لحدود الساعة مزال معطات جاوب مقنع للمغاربة العالقين فالخارج. عدد من التصريحات ديال مسؤولين حكوميين مافيهم حتى شي جواب واضح. كاين غير صبرو شويا ومزال تزيدو تصبرو، وزيد عليها كيعطيو أرقام ديال شحال من مغربي عالق.
رئيس الحكومة، سعد الدين العثماني، براسو اليوم الثلاثاء فمجلس المستشارين ما قال حتى شي حاجة إضافية على داكشي اللّي قالتو الوزيرة المكلفة بمغاربة الخارج نزهة الوافي فلجنة الخارجية هادي أيام، واكتفى بالقول أنه كيشكر المغاربة اللي عالقين على صبرهم، وكشف على بيهم اكثر من 21 ألف.
مصدر مسؤول أكد ل"كود" أن هاد الموضوع فيه نقاش على أعلى مستوى، واكتفى بالقول فتصريح مقتضب: "الأمر بيد جهات عليا وقريب يكون الفرج".