وناري. هادا ماشي اكشوان اللي هدر ولا بحالو هادا وزير الثقافة والرياضة والشباب الجديد: مصير الوزارة مرتابط بالنموذج التنموي الجديد ونتمى لمغاربة يجمعو الشمل

مشى الحسين عبيابة مشية بلا رجعة للحكومة. وزير لبسوه كسوة كبيرة عليه وبين ضعفو. جا عثمان فدروس ولد عبد الله فردوس من نفس الحزب العود. طبعا ما دارش شي حاجة باش كاتب دولة تابع للصناعة والتجارة والتكنلوجيات الحديثة. ماشي غير هو كتاب دولة خراين ما دارو والو.
طبعا خاصو فرصة دابا غادي يطير بجناحو هو ماشي جناح شي وزير اخر. نتسناو اش يقدر يعطي. اللي اكيد هو ما يمكنش يكون بحال عبيابة او قل منو.
البارح كانت صدمة فيه باش وقع تبادل السلط. تصريحو لوكالة المغرب العربي للانباء كان فشي شكل. واش مخلوع ولا تالف. واش اصلا عرف اش قال. حنا ف"كود" غاديين نقلو تصريحو حرفيا. اللي فهم شي حاجة ها الشابو ديالو "نبدا بالشكر لصاحب الجلالة على الثقة المولوية. ونكول ايضا مصير هاد الوزارة مرتابط بالنموذج التنموي الجديد. وانشا الله فهاد الظروف الصعبة نتمنى لمغاربة يجمعو الشمل". اش هاد الشي حنا ما فهمتاش.
اكشوان وصافي.
طبعا كان ابداع عبيابة اللي مولفين عليه. كيفاش هادا يقدر يقري فالجامعة بهاد المستوى. قال عبيابة البارح "اتمنى ان شاء الله ان هاد الوزارة فهاد السيد الوزير الجديد ان تكون ان شاء الله كما يراها صاحب الجلالة وكما يراها الشعب المغربي. ونحن واثقون ان الوزارة القطاعات الثلاث ستعرف ان شاء الله تطورا ملموسا".