لالة العروسة صور الحلقات النهائية بلا جمهور والعرس ماغاديش يديروه للفائزين

من بعد البلوكاج لي عرفو برنامج لالة لعروسة بسبب توقيف التصوير حيت المركز السينمائي منع التورناج لي فيه أكثر من 30 شخص احتراما لتعليمات الدولة للحد من انتشار فيروس كورونا، علمت "كود" أن البرنامج صور الحلقة الأخيرة في الأيام الماضية.
الحلقات لي صور البرنامج كانت بدون جمهور ولكن غادي تكون عملية توضيب وغادي ياخدو مشاهد للجمهور من الحلقات السابقة ويديرو ليها المونطاج مع الحلقات الحالية.
مصدر "كود" قال أن الكوبل لي فاز عطاوه بزاف ديال الهدايا القيمة بحال الدار وشهر العسل ولكن العرس غادي يتأجل، حتى تفوت جايحة كورونا لي وقفات العالم.
المصدر نفسه قال بإنه حتى شهر العسل خداو قيمتو فلوس على أساس أنهم يخرجو للسفر بعد انتهاء الأزمة وحتى العرس ما تلغاش بمرة، ولكن تأجل لتاريخ باقي ما تحددش.