غتدفع ليهم تقاعد شهر أبريل بلا شهادة الحياة وغاتوفر ليهم خدمات إلكترونية .. “لاسيمير” غاتهلا فالكليان ديالها بسباب “كورونا”

باش يتعامل مع الزبناء ديالو فهذ الظرفية الصعيبة ديال انتشار فيروس “كورونا” المستجد، الصندوق المهني المغربي للتقاعد “لاسييمير” (CIMR) قرر يصرف التقاعد ديال شهر مارس قبل الموعد ديالو.
من جهة أخرى، قرر الصندوق يتبع الإجراءات الوقائية اللي دارتها السلطات المغربية باش يحد من انتشار الفيروس، وهذشي من خلال التقليص من التنقلات ديال الزبناء ديالو ليه، ولهذشي قرر يدفع ليهم التقاعد ديالهم بشكل تلقائي ديال شهر أبريل بلا مايجيبو ليه شهادة الحياة او يآكتيفيو كارط “راحتي” بحال كيف جرات العادة.
وفحالة حتاجو الزبناء ديالو شي حاجة، كيدعوهم الصندوق باش يتواصلو معاه فالهاتف ولا فالإيمايل، كيف كيعلمهم بللي جميع المعلومات غايلقاوها فالموقع ديالو الرسمي، واللي كيوفر كذلك مجموعة ديال الخدمات عن بعد.