خاص الشيخ و المقدم يدورو على الديور و يقولو للناس يجلسوا فديورهم!

المواطنين المغاربة لازم تفهمو ان ڤيروس كورونا خطير و ماتستهتروش به! التوقف المدرسي راه ماشي عطلة باش تخرجو تساراو الله يهديكم! ولادكم خاصهم ضروري يبقاو فالدار ماشي كيلعبو كورة فالزناقي و هما ماعلابالهومش! الحالات غاديا و كتزاد، الدولة كادّير الي عليها، حتى نتوما كمواطنين خاصكم ديرو مجهود!
واش اعيبادلله وقت العراسات هادي؟ القهاوي خاصهم يسدو، البيران والجوامع تاهوما! اصحاب السوبرمارشي و الصيدليات خاصهم يقننو عدد الزبناء داخل المحلات، احتارم المسافة ديال متر بينك و بين الي قبل منك فالصف! نقصو من داك كثرت البوسان و تعناق! حتى المصافحة باليد راه ممنوعة! غسلو ادِّيكم بالصابون و الماء مزيان فركوهم مزيان! الي كيعطص يغطّي فمو! و اهم شيء نقصو من الزنقة ما امكن! و فهموا ان القضية حامضة.
الناس الي ماقارياش حتى هي خاص الي يوعّيها، هادي حاجة ضرورية. خاص الداخلية طلب من المقدم و الشيخ يدقو باب بباب و يشرحو للناس خطورة الوضع و أهمية المكوث بالبيت!
راه مكانضحكوش! فدول اخرى الي مجمعش رجليه من الزنقة و غير دايع فالزناقي عنده غرامة مالية ولا الحبس!