نايضة بونية مابين المسلمين ديال سبتة وحزب فوكس – فيديو

خلال جلسة البرلمان المحلي نهار الأربعاء، النائب محمد علي وصل للسبان و المعيور مع النواب ديال فوكس.
هادشي طرا فجلسة كان مبرمج فجدول اعمالها اقتراح تقدمات به المعارضة باش تكون مبادرة توقيع اتفاقية جديدة لحسن الجوار مع المغرب. النائب المسلم محمد علي فقد اعصابو و تنرفز على ممثلي فوكس .
علاش؟ نهار الإثنين خرجات جرائد اسبانية صور من محادتاث تتبين بان نواب و ممثلي فوكس عايرو بعبارات قدحية مسلمي سبتة فكروب فواتساب و جبدو حتى مدير الدرك المغربي اللي تم تكريمو من طرف اسبانيا مؤخرا بوسام رفيع المستوى.
على خلفية هاد الفضيحة ديال مسييري فوكس، ناضو جوج ديال النواب المحليين ديال هاد الحزب المتطرف قدمو استقالتهم من الحزب و دابا راهم نواب مستقليين فالجمع المحلي. نهار الجلسة محمد علي دار فوكس و كاليهم ايلا كنتو رجال خرجو للزنقة و قالو للناس راكم بغيتو تقتلوهم فإشارة لواحد الشاط فواتساب لمحو فيه بعبارات واضحة لقتل مسلمي سبتة.
هادشي مشا بعيد حيت تقدمات شكوى ضد فوكس من طرف الجمعية ديال المسلمين، ضد الايسلاموفوبيا.
مسلمي سبتة طالع ليهم الدم مزيان و البارح خرجو فاحتجاجات بدعوة من بوديموس ديال المدينة.