دنيا باطمة مابغاتش تحشم.. متهمة ومخلصة كفالة ومحيدين ليها باسبورها وهكاك مازال زايدة فيه: قضية حمزة مون بيبي شهراتني ووصلاتني للعالمية.. وأنا فرحانة بهادشي لي واقع وماديرش ماتخافش -فيديو

المغنية دنيا باطمة دارت البارح الخميس خرجة جديدة في سناب شات من بعد شي شهر ديال السكات بعد متابعتها في حالة سراح في قضية “حمزة مون بيبي” هي وختها ابتسام باطمة.
باطمة بانت كتضحك من وذنيها وقالت أنها فرحانة بهادشي لي واقع ليها، وأكدات أن هادشي كان زوين او خايب زاد فشهرتها وخلا اسمها يوصل للعالمية.
وبلا حية بلا حشمة اضافت دنيا :”الضربة لي ماتقتلكش تقويك.. وصدقو أو لا أنا سعيدة بهادشي لي فيه ، وأن الناس لي عايروني شهروني ووصلوني للعالمية بلاما يعيقو. وكل ما ضربني شي واحد كتزيد القوة ديالي وأنا قوية ومؤمنة. وماتخافوش عليا أنا الرجولة منذ الطفولة”.
وأكدات أنها واثقة في القضاء المغربي، وزادت “حاجة ديروها فبالكم، أنه ماديرش ماتخافش”.