سلاليو أولاد بورحمة كيحتجو بسباب تفويت أراضيهم لشركة صناعية وكيطالبو بالتعويض

نظم مئات المتضررين فالجماعة السلالية أولاد بورحمة (منطقة احواز بالقنيطرة)، صباح هذ اليوم الخميس، وقفة احتجاجية، باش ينددوا بإحداث الجماعة السلالية لمنطقة صناعية حرة فوق أراضيها، وتفويت أراضيهم لشركة للتصنيع، وهذشي جعل سكان المنطقة مايبقاوش خدامين فالفلاحة اللي كانوا عايشين منها، ويعانيو بالتالي من الفقر والبطالة.
وحديثو ل”كود”، قال أحد المحتجين باللي الأمر كيتعلق بنهب ما يزيد عن 245 هكتار من الأراضي، واللي تم السطو عليها والتصرف فيها دون تعويض أصحابها السلاليين، اللي كيقتارحو تشغيلهم فالمنطقة الصناعية اللي مازال ماتدارت، واللي كايقولو باللي غاتكون فيها استثمارات مهمة ومن بعد يتم تعويضنا، والأراضي مازال خاوية، تم فقط بناء شركة صناعية، ومازال ما شفوا والو لحد الآن.
فهذ الإطار، دخلات رابطة المغربية للمواطنة وحقوق الإنسان على خط هذ القضية، وطالبات وزارة الداخلية باش تفتح تحقيق فهذ الشي، وطالبات بضرورة تمكين كافة السلاليين من مدخراتهم المادية الناجمة عن تفويت أراضيهم لشركة صناعية تم بناؤها فالمنطقة.
وقالت الرابطة، في بلاغ توصلات بيه “كود”، بللي السلطات المتعاقبة على المنطقة ساهمات، بمباركة من النواب، في تفويتات كثيرة ومتعددة لهذ الأراضي، من أجل بناء منازل مكاينتاميوش للجماعة السلالية، بالإضافة لقطع أشجار “الكالبتيس” الموجودة فالمنطقة والاستلاء على أراضيها دون تعويض السلاليين.
وذكر البلاغ نفسو باللي ماتمش فتح تحقيق فنهب هذه الأراضي، وإقصاء ذوي الحقوق رجالا ونساء، وخصوصا منهم النساء اللي قاموا بإخلاءهم من المنطقة بشكل قسري وهدم بيوتهم، وهذشي وماتمش فتحت تحقيق فبحال هذ الأفعال لترتيب الجزاءات القانونية وتعويض المتضررين.
وكان لبارح انعقد اجتماع بمقر الجماعة القروية لجماعة عامر السفلية، جمع قائد عامر السفلية والهيئة النيابية للجماعة السلالية أولاد بورحمة مع جمعيات المجتمع المدني ومجموعة من أفراد الجماعة السلالية، لمناقشة مجموعة من المواضيع المتعلقة بالمشاريع الجديدة التي سوف تعرفها المنطقة من استثمارات.