ها كيفاش نصاب صيد زياش ف فرنسا.. وها الرد ديال اللعاب المغربي

ف الماتش اللي لعبات اجاكس ضد ليل الفرنسي برسم التشامبيونز ليگ نهار الاربعاء 27 نونبر الفايت، تقريبا كلشي شاف الولد الصغير اللي دخل للتيران كايجري باش يعنق النجم المغربي حكيم زياش اللي كايعتبرو لاعبو المفضل.
لكن القصة ما سالاتش هنا، حيث تبين فيما بعد أن زياش تصيد بعد ما سالا الماتش و ان واحد النصاب كان ف التيران زرب عليه و خذا منو التوني اللي لعب بيه المباراة.
فحسب الصحافة الهولندية، من بعد ما سالا الماتش مشا زياش كايقلب على ذاك الولد ولكنه ما لقاهش، وهنا جا عندو النصاب وقدم ليه راسو على اساس انه والد ذاك الدري، زياش عطاه التوني ديالو هدية يديها للمعجب الصغير.
المفاجأة غادي توقع من بعد، من لي تلاح هاذ التوني فواحد الموقع للبيع عبر الانترنت.
فالأول اعتقد الجميع ان الولد اللي نزل للتيران هو اللي حطو للبيع قبل ما يتفضح كلشي عندما خرج المعني بالامر بتوضيح قال فيه انه ماشي هو و ان باباه ما تلاقاش زياش ذاك النهار ف التيران، وان الشخص اللي هضر مع اللاعب المغربي مجرد نصاب استغل الموقف باش يديرها بزياش و ياخذ منو التوني باش يبيعو ويصور على ظهرو الفلوس.
View this post on Instagram
ATTENTION followers and whoever this message crosses! I'm trying to get in touch with (the parents of) the kid who ran towards me during Lille – Ajax! Please forward this to them, as I've give a man who claimed to be his father my shirt. Apparently he isn't the father and didn't give it to him. Send me a DM with one of the family's instagram/facebook account. People who try to trick me like the man above will be blocked.
A post shared by Hakim Ziyech (@hziyech) on Dec 6, 2019 at 4:28am PST
لبارح زياش حط بوسط فالكونط انستگرام ديالو، قال فيه انه كيحاول يتواصل مع والدي الدري واضاف أنه من الواضح أن اللي عذاه التوني ماشي الأب وماعطاهش للدري.
وطالب زياش من عائلة الطفل فحال توصلات بهاد البوسط، التواصل معاه، وكمل التدوينة بتهديد اي واحد بغى ينصب عليه ويديرها بيه يرد بالو مزيان.